رباعيات مصرية

أسلوب حياتي هترفضـــه أو تقبله أنـــــت حــرّ
أنا طفل شـارع وغصب عنـــي أبتــــليت بالمــرّ
يتيم .. فقير .. مريض .. ما تقولش وأنا مــــالي
عندي أمل تساعدني مع إني لا هنفعك ولا أضرّ
وآه
* * *
ياللي بتبـــحث عن أي شيء حلو وجمــــيل
دي الدنيا ملــــيانه وعندي ليك مليـون دليل
الصحه والستر والأهل والصـحبه والحريه
وبنــت زي القمـــر ضحكــــتها تشفي العليل
وآه
* * *
10 سنيـــن وأنا قاعده علـــــى دا الحـــال
عــــاجزه و مريضه سبحان مغير الأحــوال
مين كــــان يصـــــــــــدق إني أقـــــــول الآه
ومين كــان يقول إن الســـعاده مش بالمـال
وآه
* * *
قـــــالوا تحـــــت الأرض فيه كنوز كتــير كتــير
دهــــب وبترول وحديد وآثار والخير وفـير وفير
أنا ســــــبت حالــــي ومالي وقعدت أنبش وأدور
مالقيتش غير جثتين واحده لأمير والتانيه لغفير
وآه
* * *
ولــدي تعالى هــقولك كلـــمتين
وصـــدقني يابــني يانني العــين
لـــــو خــدت بيهم لازم هتكسب
إيـــــاك تـــزعل والديـك الاتنين
وآه
* * *
ورا كــــل باب مقـفــول 1000 سرّ
فرح ونكد وسعاده وشجن وحلو ومرّ
ماهو أي بيت عــــامل كمـــا الموجه
مد وجزر وموجه تِغَرَّق ومـوجه تمـرّ
وآه
أحـــــب أعيـــش وأموت كما ولـــــــــدتني أمــي
زي الطـــــــيور والحيوانات العريانين ولا هـمي
الستره والبــــــنطلون مــش م الطبيعه في شـيء
وسواء لبست.. سواء قلعت.. هيبان حَمَار دمي
وآه
أوقــــات بحـــس إن ميـــــــعـــاد الأجل قــــرب
وأخـــاف وأقول لو جه لفـــــــــين هـــاهــــرب
في غــابه ولا عــالقمر ولا فــــــــوق السـحاب
بس مــــين فيهم هيقدر يداري تخين مــــربرب
وآه
ما بيني وبـــين البين بـــــــــــــابــين
وكـــل بــــــــاب مقفول وراه لايمـين
أدخل وأخــرج وأحس بشعور غريب
كـــــــــإن روحي بتتقبض كأنه كمـين
وآه
* * *




أوقات بحس برعشه رهيـــبه وخــوف
وعينيا تتفنجل تفتح تبــــــــص تشــوف
ألاقي الـــــدنيا وحالها كما العــربخانة
وكل حـــــــمار عــــامل فيها فيلسـوف
وآه
ما بين ( س ) و ( ج ) يامــــا انتــظرت
ومـن كــــل ( ع ) و ( ز ) كتير اتنظرت
حــتى الحبابيب والقـــــرايب والصــحاب
خلوني كرهــت حـــالهم ودنيتهم هجرت
وآه
ورا كـــل بـــاب في مستشفى الولاده هزار وجد
تعب ودمــــــوع وآلام مخاض وآهات وصد ورد
ووجع تلـــــــقاه من جنس الوأوأة توأوأ معـــاه
وضحكه صافيه لنونه بتتولد وجمالها فاق الحد
وآه
يا كـــل سر مــــدفون جوه قعر الـــبير
يا هـــل ترى يا سر للبير معالم ضمـير
وإن كان له معالم إنت عالم تمنه كام
كتـــــكوت ولا أرنب ولا صـندوق كبير
وآه
هــذا العظيم هو الذى حافظ عـلى مظهره
لا عـــمره جالس حد ولا حـد يوم قـدره
ماصحبش إنسـان ولا حـيوان ولا حتى جان
ولا عــاد له غير مرايته وهـى اللى بتصبره
وآه
* * *
يا سر عـــايش من سنين هنا معـايا
مـدفون فـــي بير غويـط في أحشـايا
أنـــا جسدي كـله عـــلل عـايز طبيب
بــــس خوفى يلمحك ويبـص جـوايا
وآه
سـواق تكـاتك ومــــــــــــــاشي في الحــــواري بلف
لا عـندي رخـــــصه ولا ليه نمره والقـادر عليا يتف
يـا رب رقيني ارزقني خليـــــني أســوق ميكروباص
وابعدني عن الكمين آمين وخلي الشرطه عني تخف
وآه
يــا طيور مهاجره من بلاد لبـلاد
أمنتكم تقولوا لحبيبي كفاياه بعاد
20 سنــــــه وهــــــو هــاجرني
خلوه يعــــود ويبدل حدادي ميلاد
وآه
هــــــــو انت حـــــى ميت .. ولا انت ميـــــت حى
ضامن نفسك الخارج يعود .. ولا يروح مش جى
عـــــارف مكــــــان تربتك خـــــــــابر معاد موتك
شـــــــــايف نفسك هتضحك ولا هتــــــــصرخ آى
وآه
* * *




90 مليون مواطن مصري في الحضــر والريف مستنيين
إشاره لجل مايخوضوا المعركه ويعبروا ويحرروا فلسطين
مش معـــــــــــــــــــــــنى الكـــــــلام دا إننا بنـــــدُق الطـبول
إنما مــــــــــــــــعناه ياللـــي بتقروا التاريخ إننـــــا جاهزين
وآه
بين السطور أنا ساطر كلام زي الساطـور
دبح الورق والحبر جاب دم شفت الغـرور
لو كل واحد خط على الورق وسابه يتكلم
مش كان زمنا والنبي عدينا أعلاها ســور
وآه .

بجد اجمل رباعيات شوفتها موضوع جميل

بجد شعر روعة ومتألقه دائما يا كليوباترا ونتمني المزيد دائما من ابداعاتك وفنك ومهاراتك ومشكورة جدا

الف شكر ليكو على الردود الجميلة ويارب اكون عند حسن ظنكو
ميرسى اوووى